Бейкарвилиз ихьтин чара акъудна

Хьиливийрин хизанди чун, чи тIуьнар дуьняда гьикI машгьурна?

Миллетар, халкьар тек са тIварцIелди ваъ, кьилди чпиз талукь кеспийралди, адетралди, сенятралди, мани ва кьуьлеруналди, гьакIни цIун кIвалелди-тIуьнралдини чара ва машгьур жеда. ТIуьнрин кIвал, хуьрекар гьазурун, абур суфрадал акаюн…гьар са халкьдин умуми културадин кьетIен са пай я.
Пандемия себеб яз бейкар амукьай пешекар ашпазар тир дидени хва-Азиза ва Эмираслан Ремихановри и тIегъуьндин чан икьван кIеви, уьмуьр яргъи жедайди гьич фикирни авунвачир. Бакуда ашпазвалзавай Эмираслана, хуьруьн мел-мехъеррин тIуьнар чразвай Азизади чи милли хуьрекар теблигъ авуник кьил кутуна.
Идея, гьелбетда, Эмираслананди хьана. И арада адахъ мад са шумуд талант-тешкилатчивиле, режиссервиле, операторвилени алакьунар авайди винел акъатна.
Сифте хуьрелай са тIимил яргъаллай чпин чилел гъвечIи зур кума, зур кIвал-“къацу кIвал” туькIуьрна. Ахпа тIуьнар гьазуриз, абур чпи арадал гъайи “Хуьруьн уьмуьр” тIвар алай “You Tube” каналда эцигиз гатIумна.
Са куьруь геренда 65 агъзурдалай виниз килигзавайди кIватIай каналдикай гьасятда тIуьнар теблигъзавай пешекарри, гьакIни 26 миллион килигзавайди авай машгьур “Тaste Life” чинин сагьибри хабар кьуна.
“Тасте Лифе”ди хьиливи дидедини хци гьазурнавай цIудалай виниз видео чпин чинал эцигнава хьи, абуруз килизавайбурун кьадар рекорддин-120-150 миллиондилай алатнава.
ЧукIурзавай видеояр ингилис, урус, гьакIни чин (китай) чIалалди хьуни килигзавайбурун аудитория мадни гьяркьуь ийизва.
Шазан гаталай и кардик экечIнавай чи ватанэгьлийри йисан вири береяйра-гатуз, зулуз, гатфарихъ, гьакIни хъуьтIуьз чIугунар кьилиз акъуднава. “Менюда” лагьайтIа, Азербайжандин, гьакIни лезгийрин, дуьнядин халкьарин тIуьнри асул чка кьунва.
ТIуьнар кIарасдин цIал, сачунал, цурун къажгъанда, хьрак, цукIварал…гьазурзава. Абурун жуьреяр вишелай виниз я! ЦкIандилай, афаррилай, шурвадилай гатIумна…алай девирдин десертрал кьван!
Пара видеойра Азиза вахан диде Незифе бадеди, кайванидиз залан крара-кIарасар кукIвардамаз, ацIай къажгъан цIал эцигиз-авуддамаз…куьмекарзавай уьмуьрдин юлдаш Гьуьрметани, хтул Муьслуьмани иштиракзава. РикIиз мили хуьруьн мензерайри, патарив галай кIвалин гьайванрин ва къушарин ванери, къугьвазвай хтулри видеояр мадни тIебииди ийизва.
И кар килигзавайбуру кхьизвай рейрилайни кьатIуз жезва:“Квез гьалал я, тIебиатдал икьван рикI алай, ам хуьзвай, адан винел арадал гъанвай михьи няметрикай икьван хъсан тIуьнар чразвай”; “Заз икьван гагьди Азербайжан тIвар алай уьлкве, ам алай чкани чидачир. Вуч хъсан я, вун хьтин алакьунар авай, зегьметчи дидейри уьмуьрзавай са макан ччир хьана заз. Рекьер ахъа хьунни анагар жуван вилералди акуна, а тIямрикай нуш ийиз кандай”.
Ихьтин фикирар, алхишар агъзурралди, цIуд, виш агъзурралди я. Чи, гьакIни къецепатан вишералди шегьер ва уьлквейрай. Анжах луьгьун хьи, Ремихановроврал пехилбур, вили къачун тийизвайбурни авачиз туш. “Тар къеняй неда”- лагьанва бубайри. Ингье, ахьтин чIулав рикIин сагьибрикай сада кхьизва:“Кьвед-пуд ризкьи са-садак какадарна цIун винел эцигун алакьун туш. И тIуьнрал Азербайжандин хуьрекар тIвар нагьахъ эцигзавайди я. Малдин кьиликай гьазурзавай тIуьнилий аквазва хьи, ибур лезгийрин хуьрекар я. Азербайжандин тIуьнрик кицягъмир”
И атIугъандин жавабар вишералди килигзавайда хъсандаказ хъугузва, ам ахьтин гафар кхьинал пашманарзава:“А чайдал, сачун винеллай тIуьнал зи темягь ацукьна хьи! А ви гьар са кар алакьзавай гъилериз зун кьий, зи рикIел жуван диде, ада чразвай тIуьнар хтана!”
Гъилериз къуват, Ремихановар, куьне кьилди ресторан ахъайна мугьманар кьабулдай югъ хьурай!